|
|
Tenor
A Obnd vom B. Hartl beim b.choired
Im Februar 2006 hot mei Handy gscheppert und es hot mi wer gfrogt, ob i – jo i, da Börni, beim biqueiat midsinga wü. I hob ma docht: „Hans hiaz narrisch, wos woins mit mia?“ De wissen, dass i Klaviaspün kau, owa net dass i a singa dua, außa vom Gospelchor her.
|
|
Und scho is losgaunga. Da Revarend hot in da Prob gfrogt, ob ma beim Knut de Stö dasingan oder ob ma vielleicht a Hüfe brauchen, weil er hätt sunst fia uns a Eselsbruck.Na, hob i gsogt, i schmid ma waun daun söwa ane, owa de Stö vagis i eh net. Guat, hat der Revarend gmant, wennst net maxt, dann halt net. Und weu ma daun im Tenor oli verkehrte Notn gsunga haum, deaf ma nu imma net de neichn Numman singa, de da lingan.
Waun vielleicht a nu a Numma mid an fremdländischen Text dabei is, den so goa kana aussprechn kau, sogt der Baumi oft nur: „de ane lies i eich nu voa, daun dammas weg. Des san oft die Texte, an di ma si erinnan kunnt wia mas aussprechn muas, waun ma de Ohrn aufspreitzert und net nur de gaunze Zeit schwätzn tat, wos des Problem is, des dan i oiwei hob. Drum kriag i a oiwei a Klassnbuacheintrogung, weil i maunchmoi schwätz, owa es san eh Fochgespräche. Es is im Revarend wurscht – er schreibt mi ei…
Noch da Prob hasts daun meistns: wo gemma hi? Zum Chinesn? Immer gibt’s an Reis noch da Prob, i mecht amoi in a Fischrestaurant, do gibt’s vielleicht an Hai, der liegat net so im Mogn. Eh wuascht foan ma hoit zum Chinesn, der kennt uns wenigstens scho.
I ren extra schnö zum Auto und foa glei weg, dass i an guatn Parkplotz kriag und - wos is – nix frei Wia i daun bei da Tia eini geh, sitzn scho zwa Typn bei am Tölla A6 und da ane sogt gaunz leise zum aundan: „Is deins durch?“ worauf da aundere ziemlich aubissn sogt: „na, es is roh, Bert“. I denk ma: „Nau gottseidaung, dann was i eh scho wos i heit net iss….Owa a Nochspeis wissat i scho: A heiße Liebe, ma des warad wos guats, owa wer waß, ob da Chines im Winter frische Beer’n hat, i glaubs net waun i ehrlich bin! Do iss i liawa nu a flambierte Eiskugel, do is außadem ka rinate Soß dabei, mit der i mi aupotzn kau.
Leider vageht de Zeit beim Chineserer daun oft vü zu schnö und scho san noch anahoib Stund de erstn schu wieda dahi, weis scho miad san oda nu furtgengan. Der Chines hot vom Zoin her a ausgefuchstes system: beim Tisch kaust die Zech mit da Koatn zoin und es geht owa an der Bar bar a,des findst jo net üwaroi. Und schnölla ois ma schaun kau, löst si der Rudl von Sängern auf und gfreit si scho wieda aufn üwanextn Freitog, weu do is wieda Prob Voi Supa he…
|
